Ungir fullorðnir er samvinnuverkefni Janusar endurhæfingar, Geðheilsuteyma heilsugæslunnar, geðdeilda Landspítalans, Þrautar og Önnu Maríu Jónsdóttur geðlæknis. Undirbúningur hófst árið 2018 og fyrstu þátttakendur verkefnisins hófu endurhæfingu hjá Janus endurhæfingu í ágúst 2021 en þá tók gildi þjónustusamningur milli Sjúkratrygginga Íslands og Janusar endurhæfingar varðandi verkefnið. Tilgangur verkefnisins er að byggja upp hæfingar- og endurhæfingarþjónustu fyrir unga fullorðna sem ekki hafa náð að fylgja jafnöldrum sínum í námi og/eða vinnu, m.a. vegna mikillar andlegrar vanlíðunar og/eða óhefðbundins taugaþroska.
Endurhæfingin felur m.a. í þverfaglegt sérhæft mat á stöðu og þörfum einstaklingsins og gerð einstaklingsmiðaðrar endurhæfingaráætlunar í samvinnu við teymisstjóra/tengilið einstaklingsins innan Janusar endurhæfingar.
Í fyrstu er áhersla lögð á hæfingu, mótun og innleiðingu uppbyggilegrar daglegrar rútínu. Viðkomandi velur sér einnig í samráði við sinn teymisstjóra/tengilið fjölbreytt námskeið á vegum Janusar endurhæfingar og útbýr sína eigin stundaskrá.
Í framhaldinu tekur við tími endurhæfingar og meðferðar, með aðlöguðum stíganda í vali á meðferðarþáttum. Áhersla er einnig á stefnumótun og byrjað er að undirbúa næstu skref, sem t.d. eru í átt að námi eða atvinnu.
Að lokum tekur við eftirfylgni þar sem viðkomandi er studdur áfram ínní næsta skref sem gæti verið atvinna, nám og/eða tenging við aðra fagaðila. Áhersla er á að styðja við hinn unga fullorðna í að viðhalda stíganda og virkni í daglegu lífi sínu, nýta sér þau verkfæri sem hann hefur áunnið sér í endurhæfingunni um leið og viðkomandi tekst á við nýtt hlutverk í lífi sínu.
