Hjá Janusi endurhæfingu fer fram starfs- og atvinnuendurhæfing. Markmið starfseminnar er að aðstoða fólk til að komast á vinnumarkaðinn og fyrirbyggja varanlega örorku.

Hjá Janusi endurhæfingu starfa hátt á fjórða tug sérfræðinga. Innan Janusar endurhæfingar eru 3 brautir; Heilsu- og Skólabraut, Iðjubraut og Vinnubraut. Þessar brautir gegna mismunandi hlutverkum og gera mismunandi kröfur til þátttakandans. Möguleiki er á að færa sig á milli brauta eftir því sem við á og árangur næst í endurhæfingunni. Þessi fjölbreytni eykur möguleika þátttakandans á því að ná tilætluðum árangri.

Hver þátttakandi fær tengilið sem er fagaðili og á bak við hann er teymi sérfræðinga. Tengiliðurinn og þátttakandinn gera einstaklingsmiðaða áætlun varðandi endurhæfinguna sem tekur mið af markmiðum og þörfum þátttakandans. Þátttakandinn setur sér markmiði varðandi endurhæfingu sína í samvinnu við tengilið sinn og nýtur stuðnings þverfaglegs teymis Janusar endurhæfingar til að fylgja þeim eftir.

Um leið og þátttakandinn vinnur að markmiðum sínum fer fram reglulegt mat á stöðu hans, endurskoðun á markmiðum og árangri ásamt gerð nýrra markmiða, allt eftir þörfum hverju sinni.

Þátttakandanum standa til boða einstaklingsviðtöl eftir þörfum við starfsmenn Janusar endurhæfingar. Markmið þeirra geta t.d. verið að vinna með daglegar venjur, líkamlega heilsu, andlega heilsu, sjálfskoðun, sjálfseflingu og aðstoð í praktískum málum svo sem.s. félagslegum og fjárhagslegum. Fjölskylduráðgjafar sjá um hjóna- og fjölskylduráðgjöf eftir þörfum og iðjuþjálfar og sjúkraþjálfarar fara inn á heimili eða vinnustaði þátttakanda og veita þar vinnuvistfræðilega ráðgjöf ef þörf er á.

Endurhæfingin fer fram í húsnæði Janusar endurhæfingar, hjá ýmsum samstarfsaðilum Janusar endurhæfingar svo sem Tækniskólanum- skóla atvinnulífsins auk starfsþjálfunar á vinnumarkaðnum.

Janus endurhæfing ehf. er í samvinnu við marga aðila. Má sem dæmi nefna; Tækniskólann – skóla atvinnulífsins, Virk starfsendurhæfingarsjóð, World Class, Þraut, Landspítalann, Umboðsmann skuldara, Kvíðameðferðarstöðina (KMS), Sjúkraþjálfunarstöðina og ýmsa aðra.

Neysla

Viðhorf og reglur Janusar endurhæfingar til fíkniefnanotkunar, og ofneyslu áfengis:

  • Notkun fíkniefna er ólögleg skv. landslögum.
  • Notkun fíkniefna, annarra ólöglegra efna/ofnotkun áfengis er hættuleg heilsunni.
  • Notkun fíkniefna, annarra ólöglegra efna /ofnotkun áfengis er ekki leyfð á endurhæfingatímabilinu.
  • Notkun fíkniefna, annarra ólöglegra efna /ofnotkun áfengis og endurhæfing fara ekki saman.
  • Notkun fíkniefna, annarra ólöglegra efna /ofnotkun áfengis hindrar þátttakandann í að ná árangri í endurhæfingunni.
  • Miðað er við 3 mánuði án notkunar fíkniefna, ólöglegra efna /ofnotkunar áfengis áður en endurhæfing hefst.

© 2018 Janus endurhæfing ehf. | Læknisfræðileg starfs- og atvinnuendurhæfing | kt: 671099-3629 | Sími 514-9175 | janus@janus.is | Janus endurhæfing er opin alla virka daga milli 8:00-16:00 | Síminn er opinn virka daga frá 8:00-12:00 og 13:00-15:00 |