Skilgreiningar


Hér að neðan verða skilgreind nokkur af þeim hugtökum sem notuð eru innan Janusar endurhæfingar.

Starfsendurhæfing; er skilgreind þannig í Janus endurhæfingu að markmið endurhæfingarinnar er starf í víðri merkingu. Hér getur verið um margskonar starf að ræða s.s. sjálfboðaliðsstarf, félagsstarf, umönnun heimilis, vernduð vinna eða atvinna á almennum vinnumarkaði.

Læknisfræðileg starfsendurhæfing; sama skilgreining og á starfsendurhæfingu auk þess sem læknir vinnur á staðnum, er hluti af þverfaglegu teymi og þátttakandi í daglegu starfi („interdisciplinary“ nálgun). Beitt er læknisfræðilegum, félagslegum, sálfræðilegum og tæknilegum úrlausnum allt eftir þörfum hverju sinni til að minnka þá skerðingu sem orsakast hefur af völdum sjúkdóms, áfalls eða slyss. Markmiðið er að einstaklingurinn nái sem mestri færni þannig að þátttaka í samfélaginu takist sem best.

Atvinnuendurhæfing; er innan Janusar endurhæfingar skilgreint sem mun þrengra hugtak en starfsendurhæfing. Markmið endurhæfingarinnar er launað starf á almennum vinnumarkaði.

Teymismeðlimir; eru þeir sérfræðingar sem tilheyra þverfaglegum teymum Janusar endurhæfingar (læknir, sálfræðingur, iðjuþjálfi, sjúkraþjálfari, félagsráðgjafi og leiðbeinendur) og vinna saman við að styðja einstaklinginn til að ná árangri í endurhæfingunni.

Tengiliður; er sá aðili sem m.a. skipuleggur og heldur utan um endurhæfingu einstaklingsins með honum, gerir með honum endurhæfingaáætlun og styður hann í að ná skammtíma- og langtímamarkmiðum sínum. Tengiliður veitir einstaklingnum regluleg viðtöl og greiðir götu einstaklingsins eins og frekast er unnt gegnum endurhæfingaferlið.

AL1160730

Prenta Netfang